Vilagarcía achega unha nova quenda de cursos de inclusión e capacitación dixital
mércores, 22 de marzo do 2023
Unha nova
edición dos cursos de Inclusión e Capacitación Dixital
impartiranse no centro de Matosinhos até o mes de novembro por parte
da Concellería de Formación e Emprego. Os cursos
están encamiñados a calquera persoa de Vilagarcía maior de 18
anos. A participación é de balde e os interesados deben inscribirse
de xeito presencial acudindo ao centro de formación de Matosinhos de
luns a venres en horario de 9 a 14 horas. Alí poderán elixir a
actividade ou actividades que lle interesen e fixar a súa
dispoñibilidade horaria, xa que se farán quendas de mañá ou de
tarde en función das necesidades dos participantes.
Estamos a falar de 17 accións formativas diferentes, divididas en
cinco bloques temáticos adaptados aos diferentes niveis de
coñecemento e manexo das novas tecnoloxías do alumnado. Están
pensadas tanto para romper a brecha dixital e facilitar o uso cotiá
dos medios dixitais ás persoas que por falta de coñecementos ou
medios non saben desenvolverse nelas, como para avanzar máis aló
ofrecendo a formación necesaria para a procura e mellora de emprego.
Cristina Parracho, voceira da consultora que imparte os cursos,
explicou que os contidos van variando, desta volta a formación
complétase co uso dos dispositivos móbiles: “Trátase de que
calquera persoa saiba pedir cita no médico a través do teléfono,
ou ver o seu expediente médico, ou solicitar un certificado a unha
administración, cousas moitas das cales xa só se poden facer de
xeito dixital”.
Así, estes cursos están dirixidos ás persoas que carecen de
coñecementos e experiencia no uso dos medios dixitais. Inclúe catro
cursos básicos que lles permitirán navegar e realizar as tarefas e
os trámites máis comúns no día a día: son o curso de Iniciación
á informática e internet para adultos; o de Correo
electrónico: webmail; o de Seguridade na rede e o de
Inclusión dixital en dispositivos móbiles. A primeira das
actividades ten unha duración de 30 horas lectivas e as restantes
15.
Alén disto, estas actividades formativas queren avanzar no nivel de
coñecemento, con accións que permitirán ao alumnado manexar
procesador de textos e follas de cálculo, así como elaborar
presentacións en software libre. Os catro cursos que se inclúen
impartiranse en nivel de iniciación e nivel avanzado, en función
dos coñecementos previos dos asistentes.
As actividades previstas son o curso de Procesador de textos,
Folla de cálculo, Elaboración de presentacións e
Bases de datos. Todas elas contan con 30 horas lectivas.
Cunha perspectiva encamiñada ao ámbito laboral, o programa inclúe
neste bloque temático un curso sobre Redes sociais e procura de
emprego e outro sobre Deseño
dun perfil profesional. A primeira actividade ten unha
duración de 30 horas e a segunda 15.
As persoas que xa operan con soltura cos medios dixitais tamén
dispoñen de oferta formativa a través deste programa con cursos
como o de Deseño de páxinas web con Wordpress, Deseño de
contidos interactivos: Canva e Genially; Sincronización de
dispositivo de control parental; Retoque fotográfico e
Cloud Computing.
Engadir que se inclúe un último bloque temático centrado na
administración electrónica mediante o uso das distintas ferramentas
que se necesitan. Así, impartirase un curso sobre: Uso do DNI-e/
Chave, PIN, e certificados dixitais e outro sobre Trámites
electrónicos e E-Administración. Cun apartado específico
destinado á sede Electrónica do Concello de Vilagarcía.