Vigo e Santiago, á cabeza da nosa terra en materia de transparencia
luns, 10 de xullo do 2017
- Un recanto da cidade vella de Vigo
O pasado venres fixéronse
públicos os resultados deste ano relativos ao Índice de
Transparencia dos Concellos, que guinda novamente un panorama
positivo respecto das nosas grandes cidades. Sobre todo de Vigo e
Santiago, que se sitúan á cabeza das urbes galegas e, tamén, entre
as cidades do eido estatal que máis e mellor traballan para que todo
o relativo ao traballo e á súa xestión sexa coñecido e
participado pola cidadanía a través das novas canles dixitais. No
caso de Vigo, foi quen de acadar 98,8 puntos sobre cen posíbeis, o
que confirma a vontade do actual equipo de Goberno de acadar “un
Concello absolutamente cristalino”. Polo que respecta á
segunda cidade máis transparente da nosa terra resultou
ser Santiago, cun total de 91,9 puntos, seguida dos 83,3 de
Ferrol, dos 83,1 da Coruña, dos 78,1 de Pontevedra e dos 71,9 de
Ourense e Lugo.
No caso de Compostela, o
actual equipo de Goberno valorou o importante despegue dado pola
cidade nos últimos anos en materia de goberno participativo, dixital
e democrático, xa que a nota conseguida hai só tres anos, en 2014,
foi só do 66,3. No conxunto do Estado, Santiago ocupa o posto 66
nunha lista de 110 concellos.
No que se refire a fitos
composteláns en materia de transparencia, o Concello salienta a
Ordenanza de transparencia, acceso á información pública e
reutilización de datos da administración do Concello de Santiago
(un texto baseado nunha ordenanza redactada pola FEMP pero máis
esixente no que ten que ver coas entidades que están obrigadas a
publicar a información, incluíndo ás concesionarias de contratos
administrativos). Ademais, o Concello lembrou que forma parte do
proxecto Plataforma de Goberno Aberto, Colaborativa e Interoperábel,
o proxecto de Administración Electrónica habilitado xunto coa
Coruña, Madrid e Zaragoza, e cuxo obxectivo é “o desenvolvemento
pleno das políticas de goberno aberto nas cidades participantes,
baseado en avances tecnolóxicos dos datos abertos, a participación
cidadá e a transparencia”.
80 indicadores
O Índice de Transparencia dos Concellos é unha ferramenta para
medir o nivel de transparencia dos municipios españois ante a
cidadanía. Nesta edición, a sexta, avaliouse a transparencia de 110
concellos, a través dun conxunto integrado de 80 indicadores.
As
seis áreas de transparencia avaliadas son: transparencia activa e
información sobre a corporación municipal; páxina web e
participación cidadá; transparencia económico-financeira;
transparencia nas contratacións, convenios, subvencións e custos
dos servizos; transparencia en materia de urbanismo, obras públicas
e medio ambiente; e dereito de acceso á información.