Vigo e Ourense, pioneiras nun sistema de dixitalización da historia clínica dos doentes

mércores, 31 de outubro do 2007 Raquel Noya

O Centro de Saúde do Casco Vello de Vigo está a traballar dende hai un mes na posta en funcionamento da historia clínica electrónica en Atención Primaria, dixitalizando tódolos datos dos doentes nun único sistema de información. Mediante esta nova ferramenta, que tamén se está a empregar noutro hospital da provincia de Ourense, o devandito centro de saúde virá a completar o desenvolvemento da historia clínica electrónica única, o denominado Ianus. A conselleira de Sanidade, María José Rubio Vidal, que visitou onte día 30 o centro de saúde para coñecer o funcionamento do sistema, salientou que se trata “dun paso definitivo para integrar nun único soporte a información dos historiais clínicos dos doentes con independencia do hospital no que se atopen e do lugar onde residan”.
Deste xeito, toda a información relativa ás doenzas e ás evolucións dos enfermos que acudan ós centros de saúde, estará integrada nunha única fonte de acceso para o conxunto do cadro de profesionais sanitarios, algo que vai encamiñado a continuidade asistencial e a toma de decisións dos profesionais da saúde.
Asemade, o sistema de informatización de datos garante (a xuízo do Sergas, “de xeito escrupuloso”) o control de acceso e a confidencialidade dos datos dos cidadáns ao tempo que permite o acceso de xeito sinxelo e cómodo para aquelas persoas autorizadas polo sistema.
Neste último mes, as prescricións electrónicas do persoal facultativo de Atención Primaria da área viguesa acadaron xa o 36 por cento do total de prescricións de receitas e tres de cada catro profesionais médicos xa están acreditados, con tarxeta e sinatura dixital, para acceder ó Ianus. As previsións da Consellaría de sanidade son que “antes de rematar o ano tódolos médicos e profesionais de enfermería do Casco Vello estean xa traballando con Ianus e durante o vindeiro ano se vaia estendendo paseniño ao resto de centros de saúde da área viguesa e do resto da comunidade galega”.
As liñas estratéxicas tecnolóxicas da Consellaría de Sanidade desenvolvidas no marco do programa Ianus son, en primeiro lugar, dotar a tódolos facultativos do Servizo Galego de Saúde dunha ferramenta para a xestión da información clínica, dispoñendo dun modelo único de acceso á información dos doentes a través dun portal web e en segundo lugar, integrar a información clínica xerada polo propio sistema (citas, laboratorios, radioloxía, cirurxía, hospitalización...) nunha estrutura de Historia Clínica Única.
Con esta iniciativa, a Consellería de Sanidade aposta por un novo modelo sanitario, no que se mellore a continuidade asistencial e o sistema de derivacións aos centros hospitalarios a través da Atención Primaria ao tempo que tamén se potencie a capacidade de resolución deste nivel asistencial. Neste senso, María José Rubio manifestou que “a informatización dos centros de saúde é fundamental no desenvolvemento do primeiro nivel asistencial e supón un salto cualitativo que marcará a excelencia na atención sanitaria ofertada.”

PUBLICIDADE