Unha investigación amosa a frecuencia e a velocidade ideais dunha voz feminina virtual
martes, 30 de outubro do 2012
- Luis Coelho realizou a súa investigación no seo do Grupo de Tecnoloxías Multimedia da Escola de Enxeñaría de Telecomunicación
Como debería ser a voz virtual que nos
fala dende un navegador ou dende o servizo de atención ao cliente da
nosa operadora móbil? Cal sería o número ideal de verbas por
segundo? Estas e outras cuestións ficaban até o de agora nunha
especie de limbo, con recomendacións máis ou menos exactas pero sen
contarse con algo verdadeiramente concluínte. Exactitude e
exhaustividade é o que atopamos, precisamente, no traballo
desenvolvido polo profesor do Instituto Politécnico do Porto, Luis
Coelho, quen traballou co o Grupo de Tecnoloxías Multimedia da
Escola de Enxeñaría de Telecomunicación da Universidade de Vigo,
baixo a dirección da profesora Carmen García Mateo, para
dar corpo a unha tese de doutoramento que se dirixe a optimizar os
dispositivos de síntese de voz.
En boa medida, o que se busca a través
desta investigación é afianzar unha serie de modelos estándar para
acadar a meirande comodidade e as mellores condicións de
comunicación entre os nosos trebellos e nós os usuarios.
Con este motivo, Coelho puxo en marcha
un inventario de voces femininas en dez linguas (portugués europeo e
do Brasil, galego, castelán, inglés americano, inglés británico,
danés, finés, francés e alemán) “e os resultados amosan que
o público inclínase por unha voz que teña unha
frecuencia media de 193 Hz e velocidade de 2.8 palabras por segundo”,
informa a Universidade de Vigo.
O traballo desenvolvido pode
agora ter moitas aplicacións, tanto no científico como no
comercial, “axudando a lograr dispositivos con voces que
esperten maior simpatía, menos agresivas ou máis fluídas”,
explica o investigador. Ao seu xuízo, a análise da simpatía pode
ser tamén un recurso de gran potencial para os profesionais da voz
“que coas indicacións subministradas poden manipular a súa voz
co obxectivo de aumentar a súa simpatía”, sinala.
A investigación iniciouse coa posta
en marcha do devandito inventario de voces femininas. Cun mínimo de
cinco voces por cada lingua, cada unha delas foi avaliada por un
grupo de ouvintes nativos, “en relación a un conxunto de
criterios subxectivos, que incluíron cuestións como simpatía,
atractivo, emotividade, articulación, velocidade e
intelixibilidade”. E engade: “Con esta avaliación foi
posible caracterizar subxectivamente, a simpatía da voz e percibir,
por unha banda, como esta se relaciona con outros
conceptos e, por outro, comprender a importancia que adquire en
determinados contextos”.
Despois desta fase avaliáronse as
características obxectivas e logo, de xeito conxunto, as obxectivas
e as subxectivas, abrindo o camiño para conclusións como as que
citamos ao comezo deste artigo. En base ao que está por vir, a
finalidade é facer medrar a base de datos de voz, en linguas e máis
en tipos de voces, abríndolle o camiño ás voces masculinas.