Triste adeus a un referente do fenómeno blog

Nacho de la Fuente nos Premios 20Blogs de 2019

A comunidade xornalística galega está a amosar o seu pesar nas últimas horas polo pasamento de todo un referente que chegou a brillar a nivel internacional durante a emerxencia do fenómeno blog, Nacho de la Fuente, quen non logrou superar un paro cardíaco.
Nacho de la Fuente, co seu blog La Huella Digital, converteuse en todo un exemplo a seguir no ano 2006, cando o seu traballo foi recoñecido como o mellor blog en español dentro dos premios Best of the Blogs organizados pola Deutsche Welle entre os anos 2004 e 2012; repetindo éxito na edición de 2019 dos Premios 20Blogs, onde recibiu o premio na categoría de actualidade.
Nos seguintes anos puidémolo ver en numerosos eventos sobre xornalismo na Internet e redes sociais, como iRedes, #INLUGO ou NeThinking, cando xa ocupaba o cargo de community manager do xornal La Voz de Galicia, responsabilidade que ostentaría até finais de 2018. Dende aquela retomou a súa actividade como redactor do xornal nas áreas de Nacional e Internacional, formando tamén parte do equipo especial que informou sobre a pandemia durante meses.