Toupiciencia lanza un libro interactivo con vídeos, audios e actividades
luns, 6 de febreiro do 2023
O
proxecto Toupiciencia,
miniserie e xira divulgativa de índole científico-tecnolóxica
organizada por A Xanela do Maxín e impulsada ao abeiro de FalaRedes
(Secretaría Xeral de Política Lingüística), comezou o ano cunha
importante novidade: a publicación dun libro dixital e interactivo
dirixido a nenas e nenos de 7 a 11 anos. Segundo informaron os
responsábeis da xira e reflicte o Portal
da Lingua, o libro inclúe vídeos, audios e actividades que
mostran desde experimentos científicos ata os avances da ciencia
galega actual e os científicos máis relevantes de Galicia. Pódese
descargar o libro, en formato epub, a
través da dita web de Política Lingüística.
O
espectáculo
Toupiciencia
Show é un espectáculo de monicreques para público infantil e
familiar no que se fomenta e promove a divulgación científica en
galego nun espazo de convivencia e proximidade. Nel tamén se
comparten experiencias e ábrese o camiño ao diálogo e
interacción.
Os protagonistas da actividade, amais da rapazada
do público, son a Toupiña e o seu axudante Protonio, que andan a
buscar ás persoas científicas do futuro e para iso exploran facendo
divertidos e dinámicos experimentos utilizando o método científico,
promovendo a curiosidade e mostrando a gran importancia que ten o
facer preguntas para poder avanzar.
A serie
A
xira Toupiciencia está baseada na miniserie audiovisual de
divulgación científica en galego dirixida á nenez con 8 episodios
de 3 minutos de duración cada un, materializados co apoio da
Secretaría Xeral de Política Lingüísitica. Neles, Toupiña e
outros monicreques descobren o mundo da ciencia e as tecnoloxías a
través de curiosidades sobre a astronomía, a física, a bioloxía,
a química ou as matemáticas. O proxecto conta coa colaboración de
persoeiros do ámbito científico de Galicia, como Ángel Carracedo,
Minia Manteiga, Elena Vázquez ou Jorge Mira, entre outros. Os
capítulos están
dispoñíbeis no Portal da Lingua de Política Lingüística.