Toshiba presenta novos pico-proxectores

venres, 3 de setembro do 2010 Marcus Fernández

Os pico proxectores de Toshiba son altamente transportables

As grandes pantallas LCD están a facer que os proxectores de vídeo perdesen moito mercado no ámbito doméstico, mentres que en mobilidade están a emerxer os pico-proxectores, que cun tamaño semellante ao dun teléfono móbil, permiten a proxección de imaxes de grande tamaño para realizar presentacións ou para reproducir contidos multimedia.
Nesta liña de produtos Toshiba presentou no IFA de Berlín o seu novo LUMINEO P100, que incorpora unha lámpada LED de baixo consumo, un peso reducido e unha batería cunha autonomía de ata 80 minutos, o que agradecerán os profesionais/axentes comerciais. Este proxector é capaz de xerar unha imaxe de entre 8 e 60 polgadas a distancias de entre 20 e 152 centímetros, cunha resolución de só 640 x 480 píxeles e con só 14 lúmenes, podendo achegar os contidos a través dun conector VGA. Mide 116 x 50 x 18 milímetros e pesa 145 gramos.
Pero os usuarios máis esixentes poden optar polo proxector LUMINEO M200, que co mesmo peso e un tamaño un pouco maior, conta tamén con 2 Gb de memoria interna e lector de tarxetas microSD, medios dende os que acceder a contidos coma fotografías (JPEG e BMP), música (MP3 e WMA), vídeo (MPEG-4 AVC/H.264, WMV e DivX) e mesmo documentos de Word, PowerPoint, Excel e PDF, obviando a necesidade dun ordenador para achegar o material que queremos presentar.
Ambos proxectores chegarán ao mercado no último trimestre do ano.

Os pico proxectores son especialmente atractivos para realizar presentacións profesionais en mobilidade

PUBLICIDADE