Teremos novas PlayStation 5 antes de rematar o ano

Sony por fin fai oficial o moi rumoreado redeseño da consola PlayStation 5, confirmando os rumores de que non só sería unha consola máis compacta, senón de que tamén habería a posibilidade de engadirlle lector óptico ao modelo que se vende sen o mesmo, o que reduce a porta de entrada á actual xeración de consolas.
Temos así que as novas PlayStation 5 chegarán con deseños exteriores lixeiramente modificados, reducindo os seus volumes en máis dun 30% e os seus pesos nun 18-24%, podendo o usuario optar polo modelo con disco (cun prezo de 549,99 euros) ou co modelo dixital (cun prezo de 449,99 euros), ao que poderá engadírselle o lector de discos máis adiante a un prezo de 119,99 euros.
Aínda que poida parecer que deste xeito se mantén o prezo da consola, cómpre lembrar que actualmente a PlayStation 5 con disco e o xogo EA Sports FC 24 véndese a un prezo de 499,99 euros (promoción que remata o 12 de outubro), ou sexa, que Sony non quere disimular que pretende desfacerse das existencias actuais de consolas PlayStation 5, para deixar sitio para o novo modelo.
Temos así que de cara á campaña de Nadal (e moi especialmente durante o Black Friday) é máis que probable que haxa atractivas ofertas dos modelos actuais de PS5, para eliminar estas consolas do inventario e que así logo só queden nas tendas os modelos máis compactos.
En calquera caso, non pasamos dunha consola grande a unha bastante pequena como si aconteceu noutras xeracións, senón que desta volta os novos modelos seguen a ter unhas dimensións considerables: o modelo con disco mide 358 x 216 x 96 milímetros e pesa 3,2 quilos, mentres que o modelo dixital queda en 358 x 216 x 80 milímetros e 2,6 quilos de peso.
Aparte do cambio de deseño e tamaño, hai outro importante cambio coas novas consolas, xa que o almacenamento interno pasa de 825 GB a 1 TB, o que resulta moi de agradecer dado o tamaño dos xogos actuais (e a súa dependencia de parches e actualizacións descargables).
A data na que teremos as novas PlayStation 5 en España é unha incógnita, asegurándose polo momento que chegará en novembro como mínimo a EE.UU., pero sen detallar os territorios que recibirán as novas PS5 ese mesmo mes (aínda que parece bastante probable que España sexa un dos países prioritarios).