Teo, Ames e Santiago habilitan unha ferramenta que mostra as empresas locais que traballan en galego
mércores, 6 de febreiro do 2019
Os
Concellos
de Ames, Santiago e Teo presentaron onte unha iniciativa que recoñece
a comunicación en galego nas empresas e visualiza, perante a
cidadanía, as firmas locais que fan uso da nosa lingua e a
reivindican como unha ferramenta de valor, un prestixio de marca. A
iniciativa consiste nun directorio que abrangue os tres termos
municipais da contorna compostelá, o
directorio en liña #Galegoempresas. A presentación desta
iniciativa celebrouse no Pazo de Raxoi, en Santiago de Compostela. O
obxectivo deste proxecto é “poñer en valor aqueles negocios nos
que a nosa lingua adquire visibilidade, e facer un recoñecemento á
calidade na atención por parte destes negocios”.
Na
rolda de prensa participaron a concelleira de Normalización
Lingüística de Ames, Isabel Vaquero, o alcalde de Santiago, Martiño
Noriega, a concelleira de Cultura de Teo, Pilar Faxil, e Óscar
Maceiras, en representación da empresa que desenvolve o proxecto,
Ágora Aberta.
O
proxecto #Galegoempresas foi desenvolvido pola empresa Ágora Aberta.
Óscar Maceiras fixo saber que para o desenvolvemento do servizo
fíxose un extenso labor previo, que incluíu cousas como o
ponderamento dos indicadores de uso lingüístico nas empresas, o
deseño do protocolo de aplicación da enquisa coa que se obteñen os
datos ou, tamén, a creación da ferramenta informática para incluír
os datos das empresas, “validados e publicados de xeito atractivo e
útil”, explicou Óscar Maceiras, engadindo que a ferramenta
informática tamén deixa marxe para que a cidadanía valore a
atención que prestan as empresas, oral, escrita e telefónica.
As
concelleiras Isabel Vaquero e Pilar Faxil salientaron na cita cos
medios a colaboración institucional entre os tres concellos e
fixeron un chamamento “a todas as empresas da comarca para unírense
a esta ferramenta”. O alcalde de Santiago, Martiño Noriega, dixo
que o directorio “permitirá coñecer de maneira rápida e práctica
a oferta de empresas que funcionan en galego, dándolle unha maior
visibilidade, ao tempo que facilitará a planificación de accións
dirixidas ao sector socioeconómico en materia de lingua”.