Telefónica e a UVigo impulsan o desenvolvemento das redes 5G
xoves, 4 de marzo do 2021
Telefónica
vén de colaborar coa Universidade de Vigo e coas empresas Optare,
Minsait e GCTIO no desenvolvemento de redes 5G empregando dous
casos ben diferentes: a produción de vídeo e un coche conectado.
Máis
polo miúdo, Telefónica serviuse dunha rede 100% virtualizada para
despregar dous servizos con necesidades diversas. O primeiro é un
servizo de streaming de vídeo en Ultra Alta Definición que
require un importante largo de banda e alta fiabilidade. Para iso, o
network slicing
permite garantir as velocidades de transmisión e a calidade de rede
axeitadas para os usuarios deste servizo de vídeo.
O
segundo caso é un servizo de condución remota dun coche
teledirixido no que as baixas latencias e a estabilidade nas mesmas
son requirimentos esenciais. Asemade, network slicing achega
unha capa de rede virtualizada específica para esta tipoloxía de
servizos que asegura latencias baixas e estables na conexión.
É
preciso dicir que nos dous exemplos empregáronse técnicas de
Machine Learning que someten a unha
análise constante a calidade do servizo e a experiencia do usuario,
amais de ter a capacidade de previr unha posible degradación do
servizo e, no caso de producirse, tomar en tempo real as accións
precisas para restablecer a calidade. Isto é posible mediante o
cambio a slices de maior calidade de experiencia ou aumentando
os recursos virtuais de rede asociadas ao servizo.
Tal
e como sinalou Mercedes Fernández, xerente de Innovación de
Telefónica España: “Grazas a este proxecto avanzamos na
definición das futuras redes 5G autoxestionadas cuxo obxectivo é
garantir que os clientes sempre gocen dunha calidade de experiencia
óptima cando accedan a servizos 5G. Para iso, a rede adáptase de
maneira dinámica, automática e en tempo real (filosofía Zero
Touch) ás diferentes capacidades demandadas polo cliente, ligadas ao
concepto de network slicing”.
Telefónica
liderou a proba de concepto de redes 5G autoxestionadas mentres que
Optar introduciu os casos de uso e as funcións de calidade en rede;
a Universidade de Vigo despregou, xunto ao equipo de Optar, os
recursos da rede virtualizada, e Minsait (compañía de Indra) xunto
coa Universidade de Vigo, traballaron na configuración da contorna
de virtualización.