Super Mario Run supera os 40 millóns de descargas en 4 días

mércores, 21 de decembro do 2016 Marcus Fernández

A estrea de Nintendo no competido mercado dos xogos para dispositivos móbiles con Super Mario Run está a mirarse con atención, polo impacto que pode ter tanto no sector como na propia Nintendo, e aínda que moitos usuarios non reaccionaron ben ao feito de que esteamos ante un título para o que hai que pagar 9,99 euros para desbloquear todo o seu contido, Nintendo dá por fin datos oficiais, anunciando que en 4 días superaron os 40 millón de descargas, aínda que sen detallar os ingresos que tería conseguido a aplicación.
Dende App Annie estiman que nos primeiros 3 días o xogo tería xerado uns 14 millóns de dólares en ingresos, con usuarios de EE.UU. xerando o 55% das compras, o que moitos consideran que é unha cantidade económica moi modesta tendo en conta a enorme promoción que se fixo do xogo, aínda que cómpre destacar que o seu elevado prezo é un atranco importante para a súa compra.
Haberá que agardar semanas para coñecer a resposta do público e sacar conclusións das que de seguro que Nintendo tomará nota de cara ao futuro lanzamento do xogo para Android.

PUBLICIDADE