Soul Sacrifice será o novo xogo de Keiji Inafune para PS Vita

Xa se coñece cal será o primeiro xogo de Keiji Inafune, o creador de Mega Man, tras deixar Capcom: Soul Sacrifice. Estamos ante un título para PS Vita que está a ser desenvolvido polo estudo xaponés Marvelous AQL e pola división xaponesa de Sony Computer Entertainment, e que promete ser un xogo violento e sanguento, no que os xogadores serán escravos dun cruel feiticeiro do que buscan fuxir, para o que deberán sacrificar obxectos para empregar a maxia. Para feitizos básicos chegaría o uso de pedras e árbores, pero no caso de ataques devastadores habería que sacrificar partes do noso propio corpo, de aí que estamos ante unha formulación moi pouco ortodoxa, especialmente para un título para unha consola portátil.
Agárdase que Soul Sacrifice chegue ás tendas no inverno, incluíndo modos de ata 4 xogadores, sen especificarse polo momento de se tal xogo será cooperativo ou competitivo. A música correrá da conta de Yasunori Mitsuda (responsable das composicións de xogos como Chrono Trigger, Xenosaga, Xenoblade e Inazuma Eleven entre outros) e Wataru Hokoyama (compositor da banda sonora do videoxogo Afrika e das composicións orquestrais de Resident Evil 5 xunto a Kota Suzuki).

Sony anuncia que mañá dará máis detalles sobre Soul Sacrifice