Sonos presenta un novo altofalante portátil

Mentres Ultimate Ears segue a apostar polos altofalantes portátiles con Bluetooth, Sonos quere que os seus produtos teñan aínda máis versatilidade, e o seu altofalante Move 2 contará tamén con conectividade Wi-Fi, conseguindo así máis funcionalidades e unha maior calidade sonora.
O Sonos Move 2 sairá á venda o vindeiro día 20 a un prezo de 499 euros, e proporciona un son estéreo moi amplo, graves profundos, unha batería cunha autonomía de até 24 horas (que tamén inclúe un porto USB-C para poder cargar o móbil ou outro dispositivo cando estamos afastados dun enchufe), grande resistencia (a golpes e con certificación IP56 contra o po e a auga), inclúe control por voz, non esquece entrada de liña e, para deixar claro que estamos ante un produto moi completo, tamén é compatible coa tecnoloxía AirPlay 2 de Apple (así como cos principais servizos de streaming musical).
Cómpre salientar que non estamos ante un altofalante que prometa potencia bruta, senón que aposta pola calidade sonora, e precisamente por iso conta coa tecnoloxía Trueplay, que fai uso dos micrófonos para analizar a acústica do contorno e optimizar constantemente o son.
Estamos ante un altofalante de 241 x 160 x 127 milímetros e 3 quilos de peso, polo que queda claro que pretende ofrecer unha experiencia sonora potente e completa en case calquera recuncho, mentres que para experiencias máis básicas o fabricante tamén conta co altofalante Sonos Roam, que é moito máis compacto e só pesa 430 gramos, contando tamén cun prezo moi inferior (199 euros), axustándose así a diferentes escenarios para a música en mobilidade.