Sistema limpateclados para Mac

venres, 16 de febreiro do 2007 Raquel Noya

Tralo noso inesquecible traslado cara á outra punta de Compostela, en Código Cero (seguramente ó igual que noutras oficinas e redaccións ateigadas de equipos informáticos) precisamos dunha limpeza a fondo de tódolos gadgets acumulados e enleados entre fíos que sufriron con afouteza tódolos “tequemanexes” que lles tivemos que facer para carrexalos. Aínda non atopamos a ninguén que o faga amablemente por nós, pero para facer a espera máis agradable, podemos ir limpando o teclado co Keyboard Cleaner, unha utilidade tan sinxela como ben pensada (mágoa que só sirva para equipos Mac) que soluciona a incómoda tarefa de quitarlle o lixo acumulado ó devandito trebello. O que fai este programa, que se distribúe de balde, é deshabilitar tódalas teclas menos command + Q para poder limpar o teclado de bechos perigosos que poderían medrar e paparnos dunha atacada en calquera pequeno despiste que teñamos.

PUBLICIDADE