Samsung presenta pantallas de 10 polgadas e 300 dpi

Prototipo de pantalla de 10,1 polgadas e resolución WQXGA amosado no blog de PenTile

Antes da chegada do iPad 2 falábase da posibilidade de que incorporase unha pantalla de máis resolución que a do seu predecesor, pero non parecía ter moito sentido trasladar a popular pantalla Retina do iPhone 4 aos tablets, pero agora Samsung demostra que é posible e presenta unha nova pantalla de 10,1 polgadas cunha resolución 2.560 x 1.600 píxeles. Esta pantalla LCD é de tipo PenTitle RGBW, ten unha resolución de 300 puntos por polgada, unha luminosidade de 300 cd/m² (cun modo para exteriores de ata 600 cd/m²) e un grande realismo á hora de representar a cor, e aínda que a súa presentación leve a entender que podería ser a tecnoloxía que empregue o iPad 3, non podemos evitar comentar que o incremento da resolución de pantalla dun tablet ten outros factores a ter en conta, como o feito de que precise dunha potencia e memoria moi superiores e que careza de contidos axeitados (xa que superaría incluso os 1.920 x 1.080 píxeles da alta definición), ou sexa, que aínda que nun futuro non sería sorprendente que outros fabricantes conseguisen tecnoloxías semellantes, parece que tardaremos bastante en ver a normalización de pantallas cunha definición tan elevada en dispositivos de propósito xeral (aínda que para aplicacións que precisen de grande definición de imaxe e claridade de texto resultan claras as vantaxes de pantallas como as que presenta Samsung). ¿Teremos esta tecnoloxía no iPad 3? ¿Ou haberá que agardar o iPad 4?