Samsung presenta novas unidades SSD con interface SATA

martes, 19 de xaneiro do 2021 Marcus Fernández

Samsung anunciou hoxe o lanzamento do SSD 870 EVO, a última solución SATA da compañía surcoreana para a súa gama de unidades de estado sólido de consumo máis vendida do mundo. A nova unidade combina un mellor rendemento e a fiabilidade propia da súa categoría, converténdose nunha solución de almacenamento integral para unha ampla gama de consumidores.
Samsung 870 EVO conta co último controlador e tecnoloxía V-NAND da compañía, o que permite acadar velocidades de lectura e escritura secuencial SATA de 560 e 530 MB/s respectivamente, mantendo o seu rendemento ao máximo e prometendo preto do 38% de mellora na velocidade de lectura aleatoria con respecto ao Samsung 860 EVO.
Esta unidade, ao estar en formato SATA de 2,5 polgadas, pode empregarse en infinidade de dispositivos informáticos (dende ordenadores até NAS) e o seu modelo con 250 GB de capacidade sae a un prezo de 55,99 euros, estando dispoñible en capacidades de até 4 TB.

Vídeo promocional das SSD 870 EVO de Samsung

PUBLICIDADE