Samsung anuncia que pode bloquear remotamente televisores roubados

mércores, 25 de agosto do 2021 Marcus Fernández

A división de Samsung en Sudáfrica está a dar conta dunha funcionalidade dos seus televisores, que consiste no bloqueo remoto dos televisores conseguidos de xeito ilegal, como os que veñen de roubar nos almacéns da compañía dentro dunha serie de disturbios que desencadearon numerosos saqueos.
Samsung TV Block é unha función de seguridade que busca que os televisores só poidan ser empregados polos seus compradores lexítimos, buscando así evitar que os seus produtos rematen en mercados secundarios nos que venden bens ilegais en Sudáfrica e outros países.
Co anuncio desta medida de seguridade Samsung confía en disuadir a posibles ladróns de subtraccións futuras e tamén a vendedores de produtos roubados, xa que en canto se conecte un dos televisores roubados á Internet quedará bloqueado de xeito automático, desactivándose todas as súas funcións. O bloqueo pode eliminarse posteriormente achegando ao servizo técnico de Samsung unha proba de compra dun distribuidor autorizado.
Esta tecnoloxía anti-roubo de Samsung está preinstalada nos televisores que hai actualmente no mercado, pero a compañía non a promocionara debidamente, polo que este incidente está a ser unha excelente oportunidade para dar a entender que o roubo de produtos de electrónica de consumo pode atallarse a través da Rede.

PUBLICIDADE