Sae á luz unha rede de críticas fraudulentas en Amazon

luns, 10 de maio do 2021 Marcus Fernández

O equipo de seguridade informática SafetyDetectives atopou unha base de datos exposta na Rede que contiña máis de 12 millóns de rexistros que implicaban a máis de 200.000 persoas nunha rede de comentarios fraudulentos sobre produtos vendidos a través de Amazon, demostrando con moitos detalles unha práctica habitual pese a ir contra as condicións das plataformas de comercio electrónico (que prohiben expresamente as críticas pagadas).
A información filtrada expón un mecanismo a través do que os vendedores de Amazon reintegraban o prezo dos produtos aos compradores que deixaban unha puntuación de 5 estrelas e comentario falso sobre o produto coa clara intención de mellorar a súa reputación e os seus resultados nas buscas, práctica que facíase sen o coñecemento de Amazon, xa que o reintegro económico tiña lugar normalmente a través de PayPal, ou sexa, fóra da plataforma de comercio electrónico de Jeff Bezos.
A meirande parte dos usuarios que pertencerían a esta trama operada dende China serían de Europa e EE.UU., e entre as marcas de produtos promovidas estarían selos tan importantes como Aukey e Mpow, que actualmente parecen estar a someterse a revisión ou castigo por parte de Amazon, xa que os seus produtos aparecen como non dispoñibles. As marcas chinesas involucradas terían unhas vendas anuais que poderían superar os 1.000 millóns de dólares.
Cómpre tamén sinalar que os particulares que participaron nesta trama tamén poderían ter problemas legais, xa que nalgúns territorios a publicación masiva de críticas falsas de produtos podería considerarse un fraude con penas de cadea, aínda que moitos dos usuarios involucrados entraron neste xogo sen entender as súas implicacións legais, xa que esta rede de críticas pagadas en moitas ocasións operaba coa aparencia dun negocio lícito.

PUBLICIDADE