SIVSA mostra a súa actividade ao alumnado do IES Luis Seaone de Pontevedra
luns, 15 de abril do 2019
Entre
as empresas tecnolóxicas galegas que están a mostrar o seu labor
punteiro aos estudantes da nosa terra, amosándolles, a través do
programa Digitalent de AMTEGA, en que consiste o seu día a día,
atópase SIVSA. A firma de Vigo (con sede no Parque Tecnolóxico e
Loxístico e con máis de 30 anos de experiencia en consultoría e
desenvolvemento TIC), recibiu
o venres pasado a visita de 19 estudantes do IES Luis Seoane de
Pontevedra.
O
obxectivo da estadía foi achegarlles unha visión real do traballo
das tecnológas e tecnólogos de SIVSA, amais do funcionamento dunha
firma TIC. Amais, a rapazada tivo ocasión de coñecer o tipo de
iniciativas que se impulsan nunha empresa tecnolóxica como SIVSA, a
través do proxecto da compañía FutureLab + CodeFun.
Acompañados
por técnicos da firma viguesa, os estudantes percorreron as
instalacións e as diferentes áreas de traballo, amais de
participaren nun obradoiro práctico sobre o desenvolvemento do coche
do futuro e nunha sesión de Live Coding de introdución á
programación de videoxogos, na que aplicaron algúns dos conceptos
matemáticos, físicos e lóxicos que aprenderon no seu centro
escolar durante os últimos anos.
Con
esta presenza activa den Digitalent, SIVSA busca mellorar a visión e
a percepción que teñen as mozas e os mozos de secundaria do mundo
TIC, propóndolles unha experiencia eminentemente práctica que poida
espertar o seu interese polos estudos STEM (Science, Technology,
Engineering & Mathematics), uns estudos que, segundo engade
a empresa TIC, están “situados entre os máis demandados na
actualidade, e que reúnen as mellores competencias para desenvolver
as carreiras do futuro”. SIVSA tamén lembra que a día de hoxe, en
Galicia, só o 9,3% das persoas que se matriculan no sistema
universitario cursa carreiras do ámbito STEM, “unhas cifras que
contrastan coa alta empregabilidade dos profesionais do ámbito
dixital”. De feito, só na Comunidade o sector tecnolóxico mantivo
unha taxa de emprego estábel de arredor do 1,6%, batendo a súa
marca en 2016 con máis de 16.000 traballadoras e traballadores.
Polo
que se refire a FutureLab + CodeFun, forma parte das iniciativas
promovidas dentro do Plan de Promoción do Talento Dixital De Galicia
2020 (Digitalent), impulsado pola Axencia para a Modernización
Tecnolóxica de Galicia (AMTEGA) para potenciar as vocacións
científico-tecnolóxicas entre a mocidade.