Red Dead Redemption 2 incorporarase ao Game Pass nun par de semanas

xoves, 23 de abril do 2020 Marcus Fernández

Na actual xeración de consolas de videoxogos a PlayStation 4 pode considerarse a raíña do ámbito doméstico, pero nos últimos anos a Xbox One non quedou mal parada grazas á súa aposta por servizos como Xbox Game Pass, que ofrece máis dun cento de xogos mediante unha subscrición bastante económica, e que destaca por incorporar dende o seu lanzamento todos os xogos dos estudios de Microsoft, de xeito que simplemente con ser seareiro de franquías como Halo, Gears of War e Forza xa sae rendible a subscrición.
Pero en Xbox Game Pass non só hai títulos ligados a Microsoft, senón tamén grandes xogos multiplataforma, como Grand Theft Auto V, un dos xogos máis vendidos no último lustro, que abandonará esta selección de xogos o vindeiro 7 de maio para deixar sitio para unha incorporación dos mesmos desenvolvedores: Red Dead Redemption 2.
A incorporación do último grande xogo de Rockstar Games é unha magnífica nova para os subscritores de Xbox Games Pass, que poderán gozar así dun título moi importante, que aínda mantén un prezo de venda bastante elevado e que, aparte do seu modo historia, tamén inclúe o acceso ao mundo compartido de Red Dead Online, no que os xogadores poden adoptar distintos roles, de xeito que tanto poden converterse en cazadores de recompensas, buscadores de tesouros ou montar unha destilería ilegal.
A renovación de xogos en Xbox Game Pass é frecuente, de xeito que nos últimos días recibiu títulos como Yakuza Kiwami, Gato Roboto, Machinarium e The Long Dark, e proximamente recibirá Gears Tactics, Deliver Us The Moon, HyperDot e Levelhead, sendo especialmente atractivo este servizo na súa variante Ultimate, que inclúe títulos tanto de Xbox One como de PC, o que multiplica as posibilidades de diversión.

PUBLICIDADE