Reality Fighters para PS Vita contará cun mestre moi especial

A realidade aumentada permite levar os combates ao noso contorno no mundo real

O 22 de febreiro chegará ás tendas a consola portátil PS Vita, e entre os seus xogos de lanzamento figurará Reality Fighters, título de realidade aumentada desenvolvido por Novarama, estudo español que xa acadou grande éxito coa súa franquía Invizimals. O xogo de loita non só permitirá introducir os combates no noso contorno como xa facían no anterior título do estudo, senón que tamén permitirá personalizar os loitadores (podendo tomar como referencia o noso propio rostro) e mesmo contará cun personaxe moi especial, o Sr. Miyagi (das películas de Karate Kid) que fará o papel de guía do xogo e tamén será o xefe final ao que superar cando derrotemos ao resto de loitadores.
Os usuarios máis perseverantes poderán así desbloquear o traxe de conserxe e a bandana que emprega o Sr. Miyagi, podendo tamén manexar este personaxe, o que supón unha recompensa moi satisfactoria para os que colleron cariño a esta figura que representaba o finado actor Pat Morita.