R migrou máis de 360.000 liñas móbiles de clientes particulares á rede de MásMóvil
luns, 23 de maio do 2022
R
fixo balance dos traballos despregados para migrar as súas liñas
móbiles á rede propia do grupo MásMóvil, do que forma parte. En
concreto, trasladou e adaptou á rede de antenas do grupo máis de
360.000 liñas móbiles, o que representa o cen por cen dos seus
servizos particulares. “Grazas a isto”, sinala a operadora de
orixe galega, “os usuarios xa dispoñen dunha cobertura
sensibelmente mellorada”. Ademais, salienta que “foron cumpridos
os prazos establecidos en decembro co inicio do proceso de migración,
realizado sen incidencias no servizo e de forma transparente para as
e os clientes de R”.
A
operadora con sede principal na Coruña tamén destaca que a partir
de agora as persoas usuarias dos seus servizos teñen acceso á
completa infraestrutura do Grupo MásMóvil, “que deu prioridade aos
seus investimentos en Galicia”, e poden beneficiarse tamén dos
acordos de compartición de redes con outros operadores,
principalmente con Orange España. “Esta migración”, engade R,
“garante unha excelente conexión en calquera lugar”,
permitíndonos dispor “dun servizo de telefonía móbil excelente
de maneira sinxela”.
Amais,
a empresa galega engade que o número de antenas dispoñíbeis en
Galicia multiplicouse por 2,5 veces dende o ano pasado. “Esta
migración da rede de móbil”, explican fontes da empresa,
“sitúanos nunha posición excepcional no mercado das
telecomunicacións en España, co índice de tempo sen cobertura máis
baixo de todo o sector”.