R incrementa a cifra de familias e empresas da Pobra do Caramiñal con cobertura FTTH
xoves, 22 de outubro do 2020
- A Pobra vista dende o aire nunha imaxe de Turismo de Galicia
A
operadora de telecomunicacións R segue a traballar na comarca do
Barbanza para lograr importantes incrementos na cifra de fogares e
negocios que teñen a posibilidade de conectarse á súa fibra óptica
FTTH (polas súas siglas en inglés, fibra até o fogar). Os
traballos, que xa puxeron o foco en boa parte dos concellos da
comarca (Muros,
Noia,
Rianxo
hai uns días), seguen en activo neste último treito de 2020,
abranguendo tamén os anos vindeiros. A operadora achegou este 22 de
outubro un balance sobre o despregue recente (e o vindeiro) na Pobra
do Caramiñal. Segundo fai saber, os habitantes do núcleo da Lomba
xa dispoñen de accesos ultrarrápidos a Internet de ata 500 Mbps
simétricos e poden desfrutar doutros servizos avanzados de
telecomunicacións grazas ás redes de nova xeración de R, que
engade que o despregue fíxose “aproveitando ao máximo as
infraestruturas do lugar”.
Deste
xeito, 72 novos fogares e negocios da Lomba quedaron preparados para
recibir os servizos avanzados de teléfono, Internet de ata 500 Mbps
simétricos e televisión dixital multicanle de R. Segundo informou a
compañía galega de telecomunicacións, a peche de ano estaremos a
falar de máis de 170 residencias particulares e empresas da contorna
conectadas ás súas redes de última xeración.
Cando
se complete este plan na Pobra, tras o exercicio de 2021, a
localidade coruñesa contará xa con preto dun milleiro de fogares e
empresas con conexión ás redes de nova xeración do operador
galego.
A
maiores do Plan Avanza, R leva tempo investindo no fornecemento de
infraestruturas na Pobra do Caramiñal, onde a día de hoxe xa gozan
de cobertura das devanditas redes avanzadas arredor de 3.440 fogares
e empresas.
Estas
e outras actuacións na provincia da Coruña forman parte dun dos
tres proxectos do Plan PEBA-Avanza do Ministerio de Economía e
Empresa dos que R resultou adxudicataria en 2018 para despregar,
antes de 2021, a tecnoloxía FTTH en 512 núcleos de Galicia que non
dispoñan de alta velocidade ata o momento (“zonas brancas”).
No
desenvolvemento dos tres plans investiranse un total de 10M€, dos
cales preto de 8M€ serán subvencionados polos fondos FEDER da
Unión Europea.
En
concreto, o despregue na Pobra do Caramiñal encádrase no proxecto
destinado á extensión de redes de nova xeración en 154 núcleos de
municipios do noroeste de Galicia (A Coruña, norte de Pontevedra e
oeste de Lugo). Para estas actuacións, cun investimento total de
2,6M€ destinarase unha axuda dos fondos FEDER de 2,09M€. Un
segundo proxecto fala igualmente do fornecemento de banda larga de
nova xeración con tecnoloxía FTTH, desta volta en 162 núcleos do
centro-oeste de Galicia (norte de Pontevedra, sur da Coruña e oeste
de Lugo). O investimento total neste caso é de 3,58M€, 2,86 deles
subvencionados polos fondos FEDER da Unión Europea. O terceiro dos
proxectos adxudicados desenvolverase en 196 núcleos doutros
municipios do suroeste de Galicia (Pontevedra). A cobertura nestas
zonas suporá un investimento total de 3,75M€, cunha subvención
dos fondos FEDER de máis de 3M€.