Preparan unha alternativa ao Chromecast baseada en Firefox OS

Nos últimos días un evanxelista de Firefox amosou un dispositivo con conexións HDMI que parecía ser unha alternativa ao Chromecast de Google que funcionaría con Firefox OS, levando incluso á xente de Mozilla a ter que negar que estivesen eles mesmos a traballar no trebello (xa que non fabrican hardware), pero dando a entender que si é posible que algún dos seus partners si este a realizar tal desenvolvemento, o que en Gigaom demostran que é máis que un rumor, xa que tiveron acceso a un prototipo deste dispositivo.
O trebello baseado en Firefox OS terían un funcionamento case idéntico ao do Chromecast, sendo incluso compatible coas aplicacións para o dispositivo de Google, polo que poderiamos velo como unha resposta máis aberta ao Chromecast, o que podería facilitar a eliminación de restricións como os tipos de contidos que poden reproducirse da Internet ou as poucas plataformas para as que está dispoñible o seu SDK (por exemplo, podería funcionar con dispositivos móbiles de Amazon e móbiles con Windows Phone).
De todos os xeitos, polo momento non se coñece ningún detalle sobre este desenvolvemento a nivel de produto, aínda que as filtracións dan a entender que podería comercializarse en poucas semanas.