Parabéns á operadora R por sumarse á solicitude para acadar Twitter en galego
venres, 1 de xuño do 2012
A operadora R, un dos meirandes
representantes do noso sector TIC que aposta pola comunicación en galego (dende
hai anos), vén de amosar un novo exemplo do seu compromiso pola lingua. E faino
da man da comunidade de internautas e asociacións que están a loitar, nas
redes, para que Twitter se ofreza traducido ao galego, cousa que comentabamos
hai uns días en Código Cero facendo fincapé nunha actitude, a desta rede
social, que choca de fronte contra colaboración amosada por outros servizos
como Facebook ou Google Plus, que si que ofrecen versión en galego. O apoio de
R a prol da dita demanda foi felicitado pola Mesa pola
Normalización Lingüística.
Segundo sinala esta asociación, a
día de hoxe a lingua galega é a única do Estado español que fica excluída do
Twitter, “ante o desinterese da Xunta”,
sinala. A Mesa anima a sumármonos á cidadanía que xa se manifestou na Rede para
solicitarlle á rede social a tradución dos seus servizos á nosa lingua (a través
de translate), exemplo que
xa foi seguido por R, unha das empresas TIC máis importantes da nosa terra.
Esta adhesión á solicitude colectiva, sinala a Mesa, é sen dúbida un importante
pulo á petición.
A Mesa anima a “multiplicar os esforzos desde a base social”,
que concreta en tres propostas. A primeira, solicitar o galego a través da
páxina de tradución (translate) do Twitter; a
segunda, dirixir mensaxes pedindo o galego a @translator, e a terceira, usar
decote etiquetas como #TwitterEnGalegoXA ou #QueremosTwitterEnGalego.
A Mesa lembra que nun estudo de finais de
2011 se indicaba que, entre os 6.000 idiomas que existen no mundo, o galego
ocupa o “moi meritorio” posto 36 de
uso nesta rede social. En 2009, engádese, “a
lingua de Galiza era a única non oficial nun Estado que figuraba na listaxe mundial
das máis utilizadas no Twitter”.