Panasonic anuncia un cativo gravador de vídeo en disco duro e Blu-ray

Panasonic anunciou hoxe o seu novo dispositivo DIGA DMR-BF200, que cun tamaño de 65 x 210 x 194 milímetros e un peso de 2,2 quilogramos sería o gravador de vídeo con disco duro e gravadora de Blu-ray máis cativo do mercado, que amais pode colocarse tanto en vertical coma en horizontal.
O DIGA DMR-BF200 pode gravar en disco DB-R/RE e no seu disco de 320 Gb (o que permitiría gravar ata 290 horas en alta definición empregando un avanzado codificador MPEG-4 AVC/H.264), conta con saída HDMI, lector de tarxetas SD (para ver películas directamente dende tarxetas de memoria), Ethernet e conectividade con YouTube. Chegará ao mercado nipón o 15 de novembro a un prezo que estiman que podería andar polos 860 dólares (620,92 euros), dato non confirmado por Panasonic, compañía que tampouco anuncia as datas de internacionalización do produto.