Os referentes galegos en Compra Pública Innovadora centraron unha xornada no CETIM
venres, 4 de outubro do 2019
O
Centro Tecnolóxico CETIM, con sede en Culleredo, acolleu onte unha
xornada técnica na que se analizaron os retos e oportunidades que
ofrece a Compra Pública Innovadora (CPI) e a Compra Pública
Precomercial (CPP) para o sector da construción e as empresas e
promotores de proxectos innovadores. O encontro foi inaugurado pola
directora xeral da Axencia Galega de Innovación, Patricia Argerey,
quen salientou o papel de Galicia neste ámbito e lembrou que a nosa
Comunidade “executa o 40% dos fondos de CPI do conxunto de España”
sendo tamén “un referente en boas prácticas desde a
administración”. Argerey puxo como exemplo o caso de CETIM como
“un centro modelo que ten capacidade para captar este tipo de
fondos e xestionar proxectos de innovación”.
Pola
súa banda, Teresa Riesgo, directora xeral de I+D+i do Ministerio de
Ciencia e Innovación e Universidades, interveu no encontro para
explicar o funcionamento dos fondos dispoñíbeis para a Compra
Pública Innovadora e a Compra Pública Precomercial, “dous puntais
de fomento da innovación que facilitan un marco de traballo entre as
empresas e a administración”. Este marco, sinalou, permite
“mellorar os servizos públicos, fomentar a innovación empresarial
e situar e xerar riqueza no tecido produtivo”. Riesgo defendeu que
este sistema de compra pública convértese “nun novo e interesante
marco de relación entre as empresas e a administración, dado que
impulsa un I+D orientado a solucionar retos da sociedade en ámbitos
como a saúde, a construción, o desenvolvemento tecnolóxico e unha
infinidade de campos de interese público”.
Pola
súa banda Toni Pons, director xeral de CETIM, salientou a
oportunidade que supón para moitas empresas e para a propia
administración o modelo da CPEI ou a CPP, onde existe un “esforzo
e unha responsabilidade compartida que minimiza riscos”.
Amais,
o responsábel da Oficina de Compra Pública Innovadora do CDTI,
dependente do Ministerio de Ciencia, Sergio Capitán, precisou que “a
última convocatoria de CPI contou coa candidatura de 25 proxectos
promovidos desde Galicia”. E engadiu: “Un deses proxectos superou
o filtro e figura entre o sete propostas finalistas”.
Na
xornada analizáronse varios casos de éxito a través dos testemuños
de diferentes empresas innovadoras do sector da construción de
referencia internacional, como é o caso de OHL, COMSA, Acciona, a
galega ABN ou a multinacional BASF.
O
acto, que foi clausurado polo alcalde de Culleredo, José Ramón
Rioboo Castro, tamén serviu para que os asistentes coñecesen as
instalacións e os últimos proxectos de CETIM, un centro dedicado á
investigación e o desenvolvemento en diferentes sectores, que
participa en proxectos de ámbito autonómico, nacional e
internacional.