Obxectivo: que as prácticas en empresas TIC sexan algo máis que ir a por cafés
venres, 2 de decembro do 2011
Hai máis vida alén das prácticas empresariais
e os seus modelos, en ocasións ríxidos de máis, tal e como os coñecemos. Así o
entenden as empresas galegas A Navalla Suíza,
Cenlitrosmetroscadrado e Ekinocio, que veñen de unir forzar para pór en
práctica, e nunca mellor dito, novos xeitos de favorecer as prácticas dos
futuros profesionais no seu seo. O resultado disto é unha nova achega
innovadora, o que non é de estrañar tendo en conta a natureza principal destas
firmas devanditas: a innovación. Cun total de 60 horas, dedicadas
exclusivamente á formación, o que se pretende é atacar dúas eivas: a ausencia
de profesionais no sector do deseño de calidade e a “rixidez burocrática do sistema de prácticas”, sinalan.
As persoas que sexan seleccionadas para estas
sesións, ombro con ombro cos profesionais das tres integrantes, poderán
desenvolver labores en proxectos persoais durante unha semana nos centros de
traballo das tres empresas, combinando deseño gráfico, deseño industrial e, o
que é a parte de A Navalla Suíza, deseño web. As/os que desexen máis información
sobre estas oportunidades poden atopala na web Probeta da
devandita firma de deseño. As vantaxes de todo isto son obvias: amais das
posibilidades directas de formación, cun gran compoñente persoal de
creatividade, hai que engadir que a intención dos responsábeis da iniciativa é
que en ningún segundo da estadía se chegue a traballar en negro nin se faga
outra cousa que aprender a profesión (nada de ir a por cafés nin de facer
fotocopias).
Por certo que a idea de Probeta é Creative
Commons, e dende as empresas promotoras desta nova metodoloxía anímase a
outras entidades a que a adopten e melloren.