O proxecto Stat Wars e a ciencia dos datos afiánzanse no IES Sanxillao de Lugo
martes, 28 de marzo do 2023
O
proxecto de divulgación científica Stat Wars: A rebelión
dos datos, liderado polo Grupo de Bioestatística e Ciencia de
Datos Biomédicos da USC, en colaboración coa Fundación Española
para a Ciencia e a Tecnoloxía-Ministerio de Ciencia e Innovación,
da Rede Nacional de Bioestatística (Biostatnet), citou
este luns 27 de marzo uns 160 estudantes de terceiro e cuarto curso
da ESO no IES Sanxillao de Lugo no Pazo de San Marcos. No acto
participou Pablo Rivera Capón, responsábel de Promoción Económica
e Tecnolóxica da Deputación de Lugo.
O
proxecto Stat Wars: A rebelión dos datos constitúe unha
iniciativa dirixida a alumnado preuniversitario, a través da que se
pretende achegar a mocidade á disciplina estatística “dunha
maneira amena e divertida”, explican fontes da USC, poñendo o foco
nas metodoloxías postas en xogo: xogos e concursos orientados a que
o alumnado poña en práctica o seu espírito crítico e descubra as
diversas aplicacións da estatística na vida real, presentándoa
como unha vocación científica de futuro.
A
profesora de Estatística da Facultade de Matemáticas da USC
Mercedes Conde, o profesor na Escola Politécnica Superior de
Enxeñaría do Campus Terra e director do grupo de investigación
Proxectos e Planificación (PROePLA) da USC, Manuel Marey, e as
xestoras da investigación no Grupo de Bioestatística e Ciencia de
Datos Biomédicos (GRID-BDS) Ana Bouzas e Berta Rial, foron os
docentes responsábeis de impartir este obradoiro participativo e de
divulgación científica que se prolongou en quenda de mañá.
A
profesora da área de Estatística, Análise Matemática e
Optimización Mercedes Conde abriu a quenda de relatorios logo da
sesión inaugural, un acto no que o deputado provincial delegado da
área de Promoción Económica e Social, Pablo Rivera Capón, e a
tamén profesora da USC Ana Bouzas, deron a benvida ao alumnado
inscrito para para participar nunha xornada na que Berta Rial e
Mercedes Conde conduciron diversas actividades participativas,
mentres que o catedrático Manuel Marey ofreceu un breve relatorio
baixo o título Medindo resina coa Intelixencia Artificial.
Stat
Wars é unha idea orixinal da Universidad Carlos III de Madrid
(UC3M), que a Rede Biostatnet lanzou no ano 2017 ao territorio
nacional baixo a coordinación da USC, a través do grupo GRID-BDS. A
última edición desta acción de divulgación científica contou coa
participación dunha ducia de universidades españolas: Universidade
de Almería, Universidade Autónoma de Barcelona, Universidade Carlos
III de Madrid, Universidade de Castilla La Mancha, Universidade de
Estremadura, Universidade de Granada, Universidade de Navarra,
Universidade de Oviedo, Universidade do País Vasco, Universidade
Politécnica de Catalunya, Universidade de Salamanca e Universidade
de Valencia.
Na
sesión, Rivera Capón salientou a importancia e o atinado deste
obradoiro. “Vivimos nun mundo no que estamos inundados de datos, de
cifras. Pero, se non contamos coas ferramentas para interpretalos,
para facer series, para entender a evolución ou as variacións dos
fenómenos, os datos sérvennos de pouco”, dixo.