O proxecto Change Makers forma online as eco-líderes galegas do futuro
xoves, 21 de maio do 2020
A
entidade Fundación
Equipo Humano está a impulsar na nosa terra o
proxecto Change Makers, que, como o seu propio nome indica,
propón novas formas de producir e crear dende a colaboración, o
circular e o inclusivo (formas que collen aínda máis impulso e
protagonismo trala crise sanitaria). En concreto, Change Makers é
unha iniciativa de apoio ao emprego no ámbito medio ambiental e
tecnolóxico dirixido a persoas desempregadas, poñendo o foco
(especialmente) nas mulleres novas. Búscase, sinala a Fundación,
formar “as eco-líderes do futuro”.
Comeza
o 1 de xuño e realizarase integramente a través de Internet,
combinando sesións en directo con actividades en grupo e outros
contidos accesíbeis a través da plataforma de elearning de
Change Makers.
O
proxecto conta con co-financiamento do Fondo Social Europeo.
Artellarase en oito edicións distribuídas entre Galicia e Asturias,
co obxectivo de formar 82 changers, ou
sexa, entre dez e doce participantes por edición. O programa
conta cunha parte de formación de 60 horas que combina as
metodoloxías Visual Thinking, Lean Startup e a
aprendizaxe colaborativa por proxectos, todo “co obxecto de dotar
aos participantes dun coñecemento avanzado sobre as oportunidades e
a implantación da economía circular”.
Co
obxectivo de adaptarse ás condicións actuais derivadas do COVID-19,
o programa realizarase en liña, sendo Nicola Cerantola, e creador da
ferramenta EcoCanvas, a
peza central do equipo de profesionais e formadores do mesmo. Para
participar neste programa, as persoas interesadas deben
preinscribirse a través da
web da iniciativa.