O portal Proxector quítalle ferro ás matemáticas da man de Elena Vázquez Cendón
martes, 7 de febreiro do 2023
A
USC (Servizo de Normalización Lingüística) e o Consello da Cultura
Galega (Centro de Documentación Sociolingüística) comezaron
febreiro subministrando novos contidos e novos formatos para o portal
Proxector, iniciativa web habilitada coa finalidade de achegarnos á
divulgación e ao coñecemento investigador, ao tempo que se dinamiza
o uso do galego nestes ámbitos.
As
novidades (de fondo e de forma, con escolmas de autoría) son un
convite a “mollarnos nas matemáticas para sentilas ao velas e,
sobre todo, escoitalas coa frecuencia seleccionada polo noso mando”.
Desta
volta, cóntase coa colaboración de Elena Vázquez Cendón,
decana da Facultade de Matemáticas da USC.
Nesta
selección, hai achegas da Facultade de Matemáticas da USC en
conexión coa Comisión de Normalización Lingüística da mesma,
tanto no concurso Explícoche Matemáticas 2.0, onde alumnas e
alumnos do ensino medio falan de trigonometría e das matemáticas
que foron parteiras da informática, coma na xornada Matemáticas:
habelas hainas, queremos contarchas. Tamén hai membros da
facultade que participaron contando como xestionar datos con R
Commander, falando da xeometría do noso corpo en Lugo e presentando
á Natureza como a grande optimizadora.
O
Ensino Medio está representado polos seus docentes, contando, desde
o método de Gauss, exemplos de matemáticas da pandemia e
compartindo en Galiciencia datos de historia.
Inclúense
tamén no especial conversas sobre logaritmos e unha charla TED na
que se explica en inglés a orixe da incógnita, déixaa despexada
nesta escolma cun singular corolario do que o galego é moi
protagonista.
O
portal
Impulsado
en 2015 polo Consello da Cultura Galega e a Universidade de Santiago,
a páxina comezou o ano 2022 con novos folgos e, nun plano máis
concreto, con 600 vídeos didácticos feitos ou subtitulados en
galego.
Esta segunda vida de Proxector foi dada a coñecer en
xaneiro de 2022 por Rosario Álvarez, presidenta do Consello da
Cultura Galega (CCG) e Gumersindo Feijoo, vicerreitor de
Planificación, Tecnoloxías e Sustentabilidade da Universidade de
Santiago de Compostela (USC). O gran obxectivo, sinalaron, é
“mostrar materiais científicos, de calidade e na nosa lingua,
dirixidos a docentes e alumnado universitario e de ensino medio”.