O novo estabilizador de DJI suxeita o noso smartphone magneticamente

mércores, 26 de agosto do 2020 Marcus Fernández

Os estabilizadores para smartphones de DJI convertéronse nos grandes referentes do seu sector, e a cada versión do DJI Osmo Mobil sorpréndennos con algunha innovación rechamante. No caso do Osmo Mobile 3 o deseño do estabilizador destacaba polo seu formato encartable, que facilita enormemente o seu transporte, e agora o DJI OM 4 revoluciona a súa categoría de produtos ao optar por suxeitar o noso smartphone de xeito magnético.
Para que o noso móbil poida conectarse magneticamente co estabilizador é preciso que o noso dispositivo móbil teña colocada na súa parte exterior traseira unha abrazadeira magnética fina e lixeira que mantén seguro o teléfono durante o uso do estabilizador, aínda que se non temos previsto utilizar más dun dispositivo co DJI OM 4 temos a opción de adherir á traseira do noso teléfono un soporte de anel magnético.
Aparte do orixinal sistema de suxeición o DJI OM 4 recolle as prestacións do seu modelo anterior e incorpora algunhas novidades. Conta así con ActiveTrack 3.0 para facilitar o seguimento de obxectos; ten un modo historia para realizar narracións visuais valéndose de proxectos predeseñados; con DynamicZoom permite emular o clásico efecto de travelling compensado popularizado por Alfred Hitchcock na película Vertixe; coa función de Panorámica CloneMe permítenos encadear fotografías para crear unha imaxe panorámica na que o obxectivo pode aparecer varias veces creando un efecto moi épico; e incluso inclúe control xestual (moi práctico cando o estabilizador está colocado sobre un trípode, e así podemos disparar fotografías a distancia con sinxelos xestos).
O software do estabilizador tamén facilita a creación de hyperlapses, timelapses e motionlapses; e dentro das posibilidades creativas do DJI OM 4 tamén contamos cun modo SpinShot (que fai rotar o móbil para conseguir un impresionante efecto de gravación; tamén pode gravar a cámara lenta e facer panorámicas de 240 graos ou de 3x3 (ou sexa, que consegue un super grande angular ao realizar unha composición con 9 instantáneas).
O DJI Osmo 4 é así un produto moi práctico e versátil, que vai máis aló de estabilizar os movementos dun dispositivo, abrindo a porta a moitas posibilidades creativas, e que podemos mercar por 149 euros, prezo polo que inclúen como complementos dos estabilizador o soporte de anel magnético, unha abrazadeira magnética, unha empuñadura trípode, un cable de alimentación, unha bolsa de almacenamento e una correa de mostra.

O DJI OM4 pode manterse fixo mentres segue automaticamente o seu obxectivo ou se controla mediante xestos

Vídeo de presentación do DJI OM4

PUBLICIDADE