O novo MediaTek Dimensity 9200 soportará ray tracing e Wi-Fi 7

martes, 8 de novembro do 2022 Marcus Fernández

MediaTek vén de anunciar o seu procesador Dimensity 9200, orientado a smartphones 5G de alta gama, ofrecendo un magnífico desempeño, boa eficiencia enerxética e compatibilidade coas comunicacións sen fíos máis avanzadas, comezando a súa chegada ao mercado a finais deste mesmo ano.
O MediaTek Dimensity 9200 sería o primeiro procesador para smartphone en integrar un ARM Cortex X3 con velocidades superiores a 3 GHz, así como o primeiro en incorporar a gráfica ARM Immortalis-G715 que conta cun motor de ray tracing.
Outro detalle moi significativo é que sería o primeiro procesador para smartphones preparado para Wi-Fi 7, con velocidades de até 6,5 Gbps. O seu procesador de sinal Imagiq 890 tamén xogará un rol importante á hora de capturar fotografías e gravar vídeo, apostando pola velocidade, a precisión e o baixo consumo.
Os novos procesadores tamén soportan memorias LPDDR5X de até 8.533 Mbps e almacenamento UFS 4.0 (MCQ), polo que deixa claro que MediaTek está en plena forma para estar presente nos móbiles dos vindeiros meses.

PUBLICIDADE