O futbolín prepara a súa chegada ao iPad

Illusion Labs, estudo independente de videoxogos responsables de títulos moi populares no iPhone coma Labyrinth, remitiu o pasado venres á App Store o xogo para iPad Foosball HD, de xeito que é moi probable que esta mesma semana aproben a incorporación á tenda de descargas de Apple este orixinal xogo que sorprende agradablemente por levar o tradicional futbolín ao iPad, aproveitando a superficie multi-táctil da pantalla de 9,7 polgadas do dispositivo coma sistema de control para dous xogadores.
O xogo inventado durante a Guerra Civil Española por Alexandre de Fisterra transfórmase deste xeito nun xogo electrónico que promete ser moi divertido, aínda que haberá que agardar ao seu lanzamento para ver se é posible que dous xogadores simultáneos sexan quen de controlar os seus xogadores de xeito satisfactorio. De todos os xeitos non é de agardar que a experiencia do fútbol de mesa poida trasladarse á pantalla táctil, senón que o máis probable é conseguir xogo simple e aditivo para xogar en grupo dun xeito semellante ao Glide Hockey HD.
ACTUALIZACIÓN (12-6-2010): Foosball HD xa está dispoñible na App Store por 2,39 euros.

Demostración do funcionamento de Foosball HD no iPad