O Windows XP deixará de venderse preinstalado en ultraportátiles no outono

Aínda que Windows XP está considerado coma un sistema operativo obsoleto e amortizado, os ordenadores ultraportátiles de baixo custo forzaron a Microsoft a continuar comercializándoo, pero agora que Windows 7 é capaz de funcionar neste tipo de equipos cun rendemento semellante (cousa que non facía Windows Vista) deixa de ter sentido contribuír a aumentar a lonxevidade de XP, de aí que dende Microsoft veñan de fixar para o vindeiro 22 de outubro a data na que deixará de venderse XP aos fabricantes de ultraportátiles, no que sería por fin o cese deste sistema operativo que hai 2 anos que deixou de venderse para equipos informáticos en xeral.
No tocante ao soporte, Windows XP SP2 deixará de recibilo o 13 de xullo, mentres que o Windows XP SP3 (derradeira entrega do S.O.) manterá o soporte técnico estendido (de pagamento) ata finais de abril de 2014.