O Sony Xperia S sairá á venda a semana que vén en Barcelona

O Xperia S no seu embalaxe

O Sony Xperia S, cun procesador de dobre núcleo a 1,5 GHz, 1 Gb de RAM, 32 Gb de almacenamento interno, pantalla de alta definición de 4,3 polgadas con Mobile BRAVIA Engine, cámaras de 12 e 1,2 Mpíxeles, HDMI, NFC e un deseño elegante non só será o primeiro terminal que venderase baixo a marca de Sony (tras rematar a adquisición da parte de Ericsson da súa joint venture), senón que tamén destacará por saír á venda en primicia mundial o vindeiro mércores a 599 euros na Sony Store de Barcelona co gallo do Mobile World Congress.
Dende Sony advirten que o número de unidades será moi limitado, polo que só os máis rápidos poderán facerse cun destes atractivos móbiles con sistema operativo Android que coida detalles coma o seu acabado externo ou a calidade das súas cámaras (para poder tomar fotografías de grande calidade e poder rexistrar vídeo en alta definición).