O Sony Xperia 1 V estrea o sensor Exmor T para móbiles

xoves, 11 de maio do 2023 Marcus Fernández

Sony presentou hoxe o seu novo móbil insignia, o Sony Xperia 1 V, que presume de ser o primeiro smartphone equipado co sensor de imaxe CMOS apiado con dobre capa de transistores de píxeles, e que fai uso da tecnoloxía punta da compañía nipoa para satisfacer as necesidades dos creadores de contido máis avanzados.
O Sony Xperia 1 V ten o mencionado sensor CMOS apiado con dobra capa de transistores de píxeles no obxectivo traseiro principal que dan en chamar Exmor T para móbiles, e que ten unha distancia focal de 24 milímetros e un tamaño 1,7 veces superior a anteriores sensores de imaxe (conseguindo un rango dinámico equivalente ao dunha cámara full frame). Acompañan a este sensor traseiro un grande angular de 16 milímetros e un teleobxectivo cun zoom óptico variable de 85-125 milímetros (con apertura entre F2.3 e F.2.8).
Atendendo a demanda de certos creadores, o novo teléfono tamén coidou as súas funcionalidades para os videoblogs, contando cun novo micrófono para a voz na parte traseira (facilitando a captación da voz do creador) e tamén conta cun modo para retransmitir vídeo en directo a través de YouTube na que podemos ver en pantalla os comentarios en tempo real.
Este atractivo móbil conta cunha impresionante pantalla OLED 4K de 6,5 polgadas cunha velocidade de refresco de 120 Hz, coida especialmente o apartado sonoro tanto en gravación como en reprodución e funciona cun procesador Qualcomm Snapdragon 8 Gen 2, de xeito que tamén aproveita ao máximo a súa xenerosa batería de 5.000 mAh para conseguir unha grande autonomía (pode reproducir de xeito continuo até 20 horas de vídeo).
Este móbil tan orientado para creadores de contido chegará ao mercado a finais de xuño a un prezo recomendado de 1.399 euros.

Vídeo promocional do Sony Xperia 1 V

PUBLICIDADE