O Nokia 8110 4G terá WhatsApp en breve

O vindeiro 15 de agosto vai chegar ao mercado da India o smartphone JioPhone 2, que non só destaca por ter un teclado QWERTY, senón porque tamén, este básico dispositivo con só 512 MB de RAM e 4 GB de almacenamento que funciona con KaiOS, anuncian que vai contar con WhatsApp entre as súas aplicacións, o que atende claramente ao alto nivel de uso desta ferramenta da comunicación no país asiático. Dado que estamos ante un móbil que só custará 2.999 rupias (37 euros) temos así unha das solucións máis asumibles para gozar de ferramentas de mensaxería instantánea móbiles.
O terminal, pese ao seu reducido prezo, tamén conta con radio FM, GPS, Wi-Fi, Bluetooth e NFC, de xeito que pode ser de grande utilidade para millóns de usuarios potenciais que non demandan terminais de grandes prestacións pero tampouco queren quedar desconectados do mundo.
O bo da confirmación de que o JioPhone 2 vai contar con WhatsApp é que, por extensión, esta aplicación tamén chegará en poucas semanas a outros móbiles con KaiOS, como o novo Nokia 8110 4G, que xa está á venda en España por uns 79 euros, e que como principal eiva tiña precisamente a carencia dunha aplicación que os consumidores consideran imprescindible a día de hoxe.