O Moto X chegará a Europa en febreiro

martes, 14 de xaneiro do 2014 Marcus Fernández

O pasado verán Motorola volveu á primeira liña de fogo co seu Moto X, terminal altamente personalizable que non chegou a cruzar o Atlántico, como fixo o seu irmán pequeno, o Moto G; pero finalmente a discriminación do Vello Continente ai rematar, e Motorola anunciou hoxe en Londres que Reino Unido, Francia e Alemaña van recibir o Moto X o vindeiro 1 de febreiro a un prezo libre de 399 euros (aínda que en Francia parece que o prezo será de 429 euros se atendemos á páxina de reserva de Amazon, un dos distribuidores oficiais do móbil). O terminal podería comezar a distribuírse en España durante o mes de febreiro.
O móbil vai chegar a Europa con Android 4.4.2, a ultimísima versión do sistema operativo móbil de Google, aínda que sen as opcións de personalización de norteamérica, polo que terao complicado para poder competir con terminais como o Nexus 5 (co que coincide en prezo).
Lembremos que o Moto X é un smartphone con pantalla AMOLED de 4,7 polgadas, procesador Qualcomm Snapdragon S4 Pro de dobre núcleo a 1,7 GHz, 2 Gb de RAM, 16/32 Gb de almacenamento interno, cámaras de 10 e 2 Mpíxeles, Bluetooth 4.0, Wi-Fi AC, 4G, batería de 2.200 mAh e un peso de 130 gramos.

PUBLICIDADE