O LG Watch Urbane estrea versión de luxo

luns, 31 de agosto do 2015 Marcus Fernández

Hai uns meses púxose á venda o LG Watch Urbane como un smartwatch con Android Wear moi elegante, que cos seus materiais e deseño resultaba difícil de distinguir dun reloxo de pulso tradicional, e que cun prezo de 349 euros parecía inaugurar unha gama de reloxos co sistema operativo de Google para wearables de alta gama (mentres que a meirande parte de dispositivos de referencia poden adquirirse por menos de 200 euros) e, en vista do que o público é capaz de pagar por certos modelos de Apple Watch, LG animouse a lanzar unha edición de luxo do Watch Urbane, que nos EE.UU. vai comercializar a cadea de xoiarías REEDS Jewelers a un prezo de venda aproximado de 1.200 dólares (1.072 euros) e do que xa aceptan reservas en liña.
O LG Watch Urbane Luxe chega cun baño en ouro de 23 quilates, correa de pel de crocodilo e unha caixa exclusiva á altura deste coidado produto que diferénciase do seu modelo ordinario tamén no sistema de peche empregado, que é o inventado por Louis Cartier en 1910, e que dálle un acabado de calidade propio dos reloxos de luxo, aínda que dende LG inciden no feito de que non só buscan aparencia, senón tamén calidade, de xeito que o ouro empregado é máis duro e resistente que o ouro de 24 quilates presente normalmente nas xoias e máis pesado que o ouro de 18 quilates empregado habitualmente nos reloxos de luxo tradicionais.
Este novo reloxo de luxo vai pórse á venda nunha edición limitada de 500 unidades, dispoñible inicialmente só nos EE.UU., aínda que esta semana tamén poderase ver na feira IFA de Berlín.

O LG Watch Urbane Luxe estará dispoñible con correas de diferentes cores

Vídeo promocional do novo LG Watch Urbane Luxe