O IGFAE e o CESGA mostran como converternos en creadores de algoritmos e circuítos cuánticos
xoves, 9 de xaneiro do 2020
Na
computación cuántica está a gran resposta aos problemas complexos
da humanidade que, polas limitacións da computación clásica, non
puideron ser resoltos até o de agora da maneira máis eficaz e
satisfactoria. Esta nova orde do cálculo avanzado centrará os días
vindeiros un curso organizado polo Instituto
Galego de Física de Altas Enerxías (IGFAE) da Universidade de
Santiago. A actividade formativa, que
se celebra na sede do IGFAE entre o 20 e o 23 de xaneiro, introducirá
aos asistentes nos conceptos básicos da computación cuántica.
Está destinado a investigadores, profesores, profesionais do CIT e
estudantes. Permitiralles adquirir os coñecementos precisos para
desenvolveren por si mesmos os seus propios algoritmos e circuítos
cuánticos.
Segundo
informa o instituto sobre o miolo das materias a impartir, a
computación cuántica representa “un cambio importante de
paradigma, onde o concepto de bit transfórmase nun bit cuántico, ou
qubit, que ofrece unha enorme capacidade de almacenamento e
procesamento de información”. As inscrición poden formalizarse a
través desta ligazón e desenvolverase en horario de 17.00 a 20.00
horas. Os materiais do curso, incluíndo presentación e exercicios,
estarán dispoñíbeis para a súa descarga o mesmo día do inicio do
curso. O curso está organizado polo IGFAE coa colaboración do
Centro de Supercomputación de Galicia (CESGA). Os contidos serán
impartidos polo investigador e experto en tecnoloxías de cómputo de
alto rendemento Andrés Gómez Tato, responsábel de Aplicacións e
Proxectos do CESGA.