O IGAPE apoia o último proxecto de Dygra con máis de 3 millóns de euros
martes, 27 de outubro do 2009
O consello de
dirección do Instituto Galego de Promoción Económica, presidido polo Conselleiro
de Economía e Industria, Javier Guerra, vén de aprobar, na súa última reunión, a
concesión de 6 operacións de préstamo por importe conxunto de 8.957.100 euros
para apoiar investimentos empresariais cifrados en máis de 25 millóns de euros,
entre os que destaca o proxecto da produtora audiovisual Dygra, que está a
impulsar a realización da longametraxe Holy
Night, unha comedia que contrapón a tradición europea do Nadal coa
anglosaxona.
Trátase dun filme de
animación 3D para proxección en salas 3D estereoscópicas ou convencionais que
vai ser apoiado polo IGAPE cun préstamo de 3,1 millóns de euros.
E é que o proxecto
merece todo canto se faga por el xa que coa súa cuarta película de animación, cuxa
estrea está prevista para este Nadal, a produtora galega pretende estar á
altura dos máis grandes de Hollywood,
situándose á vangarda tecnolóxica do sector audiovisual a carón de outros
grupos como Dreamworks, Disney, Sony, Warner ou Fox.
Manolo Gómez,
fundador e único propietario de Dygra Films, aseguraba, nunha entrevista
concedida ao xornal Cinco Días
o pasado ano, que esta tecnoloxía “supón a
próxima gran revolución do cine, logo da aparición da cor nos anos cincuenta”; “O ano clave para o seu despegue será o 2009”, apostaba , “e nós estaremos alí”, concluíu.
Con este sistema, o
espectador recibe dúas imaxes a un mesmo tempo, unha para cada ollo, que o
cerebro interpreta e convirte en tres dimensións grazas á axuda duns anteollos
polarizados. A diferenza dos actuais sistemas 3D, a proxección é dixital, non
analóxica, co cal non hai ningún tipo de disrupción e ademais, o espectador
recibe 144 imaxes por segundo en vez dos 24 tradicionais.