O Game Pass de Xbox está a probar plans familiares

venres, 5 de agosto do 2022 Marcus Fernández

Os servizos de subscrición de música e contidos audiovisuais teñen normalizados os plans familiares, para que varios usuarios poidan gozar dun prezo reducido ao contratar o servizo, e esta práctica podería trasladarse aos videoxogos se atendemos ao novo programa piloto que está a desenvolver Xbox en Colombia e Irlanda, a través do que permiten que os usuarios dentro de Xbox Insiders poidan compartir os beneficios de Game Pass Ultimate.
Este novo programa permite que un usuario en Xbox Insider poida compartir con até 4 usuarios que estean no mesmo país o acceso aos xogos de Xbox, PC e na nube incluídos en Xbox Pass Ultimate. Esta modalidade de contratación pode subscribirse de novo, mentres que para usuarios existentes cada mes de subscrición converterase en 18 días do novo plan.
Esta nova modalidade de contratación de Xbox Pass Ultimate resultaría moi atractiva polo seu prezo reducido, resultando especialmente convinte nun momento no que o servizo está a espallarse a televisores, polo que usuarios que non teñan consola poderán gozar de xogos de Xbox en streaming, mellorando así a base de usuarios da plataforma Xbox, que é o obxectivo de Microsoft no ámbito dos videoxogos.

PUBLICIDADE