O Consello da Cultura e a Fundación Rosalía de Castro únense á celebración en liña da autora de Cantares Gallegos
venres, 22 de febreiro do 2013
- O mapa das alboradas colectivas da web da Fundación Rosalía de Castro
Esta fin de semana que se
achega é, sen dúbida, a fin de semana de Rosalía de Castro. Xa non
só porque o 24 de febreiro sexa a data do seu nacemento e porque en
2013 se conmemoren os 150 anos da publicación de Cantares
Gallegos, senón tamén pola pertinencia do seu discurso, da súa
obra e todo o que representou a escritora galega, hoxe en día un
símbolo de cousas que hai ter moi en conta, como a defensa e
dignificación da cultura propia, do papel da muller a tódolos
niveis sociais, do patrimonio material e inmaterial, da Galicia
popular, e moitas cuestións máis. A celebración do Día de Rosalía
terá vertentes reais e tamén, complementándoas e deixándose
complementar, vertentes virtuais. Se
onte falabamos nesta web das actividades previstas pola AELG,
hoxe é a quenda de dar conta do que preparan outras entidades. Como
o Consello
da Cultura de Galicia, que semella querer
estender as celebracións no tempo e tamén no espazo: cara ao
universo dixital.
O Día de Rosalía, por
certo, tamén servirá para facer dende moitas frontes unha
reclamación ben concreta: a inclusión deste festexo galego no
calendario escolar da Consellería de Cultura. Volvendo ás accións
do CCG, dicir que foron debulladas en detalle polo presidente do
Consello, Ramón Villares, e máis por Rosario Álvarez e Manuel
Gago. Entre as accións previstas máis salientábeis temos,
primeiramente, encontros de dupla faciana: real e virtual. Ou sexa,
con sede física e relatores concretos facendo acto de presenza, e ao
mesmo tempo, con contribucións na Rede. Falamos do congreso
internacional que dá comezo o día 28 en Santiago coa sesión
dedicada a Rosalía de Castro ante os procesos de cambio social e
cultural. Nel intervirán docentes e investigadores das tres
universidades galegas, ademais de dúas especialistas das de
Nottingham e Huelva. O 21 de marzo, 25 de abril, 30 de maio e 27 de
xuño serán as outras catro sesións presenciais. A maiores,
habilítase a opción de contribuír con comunicacións libres,
divulgadas a través da
web do CCG, que complementa esta liña de acción en liña coa
publicación da reprodución facsimilar da primeira edición de
Cantares gallegos (Vigo, 1863); un roteiro por escenarios de
importancia biográfica na vida e obra de Rosalía, unha peza
audiovisual de 1951 que se cualifica de “o primeiro vídeo do
galeguismo” ou a achega dun directorio universal de
rosalianistas.
Amais das contribucións
do CCG cómpre informar tamén do importante labor que está a
desenvolver a Fundación Rosalía de Castro na súa recentemente
remodelada web, rosaliadecastro.org,
que funciona estes días como un acubillo centralizador da longa
listaxe de actividades musicais de celebración (xeolocalizadas e de
doada consulta) previstas para a xornada do 24. Máis polo miúdo, o
que se achega é o programa conxunto de Alboradas
de gloria simultáneas que, a través dunha colaboración
entre a Fundación e a Asociación de Gaiteiros Galegos, van
homenaxear o espírito de Rosalía e a súa longa e fonda pegada até
os nosos días. As dúas entidades están a facer un chamamento ás
gaiteiras e gaiteiros da nosa terra para unírense á Alborada en
cadea. Con esta fin, na web da Fundación habilitaron unha
sección especial con materiais e referencias para poder interpretar
o dito tema.