O Campus Industrial de Ferrol acollerá a presentación da novena edición da FIRST LEGO League Galicia
xoves, 23 de febreiro do 2023
A sala anexa ao
Salón de Actos Concepción Arenal do Campus Industrial de Ferrol acolle mañá,
venres 24 de febreiro, ás 12:00 horas, a convocatoria
de prensa de presentación da novena edición da FIRST LEGO League Galicia (FLL
Galicia) que organizan a Escola Politécnica de Enxeñaría de Ferrol e o
Campus Industrial da Universidade da Coruña baixo o paraugas da asociación
ingeniera.soy.
O acto estará
presidido pola vicerreitora do Campus de Ferrol e Responsabilidade Social,
María Jesús Movilla Fernández; a directora xeral de Emprendemento e Apoio ao
Emprego, Margarita Ardao Rodríguez; o concelleiro delegado da Área de Cultura,
Educación, Universidade, Deportes e Festas do Concello de Ferrol; Antonio Golpe
Díaz; a directora do Campus Industrial de Ferrol, Ana Ares Pernas; o director
da Escola Politécnica de Enxeñaría de Ferrol, Andrés Piñón Pazos; e o
coordinador da FLL Galicia, José Antonio Becerra Permuy.
A FIRST LEGO
League Galicia terá lugar o vindeiro sábado 4 de marzo no Campus Industrial de
Ferrol e, máis concretamente, na Escola Politécnica de Enxeñaría e na Facultade
de Humanidades e Documentación. O Xogo do Robot disputarase no Pavillón de
Esteiro e a entrega de premios levarase a cabo no Auditorio Municipal de
Ferrol. Ao igual que en edicións anteriores, o evento conta coa colaboración da
Xunta de Galicia, a través da Dirección Xeral de Emprendemento e Apoio ao
Emprego, dependente da Consellaría de Promoción do Emprego e Igualdade, da
Deputación Provincial da Coruña e do Concello de Ferrol.
Ademais,
patrocina a FLL Galicia a empresa Gabadi SL, o Colexio Profesional de Enxeñaría
Informática de Galicia, Gadis, R Cable, ERROR! Ferrol, PuntoGal, Neodyn e Todo
Ocio.