O CESGA manterá activos os seus servizos
mércores, 18 de marzo do 2020
O
Centro
de Supercomputación de Galicia informou nun comunicado que manterá
activos os seus servizos, malia as continxencias derivadas do
estado de alarma e da necesidade de reducir a actividade presencial
para contribuír a frear o espallamento da pandemia. “Somos
conscientes de que as infraestruturas de cómputo, almacenamento e
comunicacións que CESGA xestiona poden resultar críticas e máxime
para aqueles centros que nalgún momento poidan realizar traballos de
investigación directamente relacionados co COVID-19”, explica o
centro sobre o feito de dar continuidade aos seus servizos de apoio á
investigación.
Este
mantemento da actividade das infraestruturas estase a complementar
con medidas orientadas a protexer a saúde dos seus traballadores ao
tempo que se asegura a operatividade dos servizos: “Todo o noso
persoal técnico e de soporte continuará dispoñíbel e operativo en
modalidade de teletraballo desde os seus domicilios, para satisfacer
as necesidades da comunidade usuaria”.
O
centro lembra que durante esta etapa de estado de alarma e
restricións, o persoal do CESGA comunicarase coa comunidade de
usuarios dos servizos do centro por vía telefónica e a través do
correo electrónico.
