O Acer Liquid Jade Primo podería custar menos de 400 euros
venres, 23 de outubro do 2015
A estrea de Windows 10 nos móbiles resulta prometedora pola
incorporación da tecnoloxía Continuum que facilita o uso do smartphone como se
fose un ordenador ao conectalo a unha pantalla externa, pero nun principio os terminais
de referencia non serán precisamente asumibles, xa que o
mes que vén sairán á venda os Lumia 950 e Lumia 950 XL a 599 e 699 euros
respectivamente; pero, como acontece con moitos dos produtos con Windows 10
anunciados por Microsoft nas últimas semanas, a compañía de Redmond só pretende
marcar os pasos a seguir, e non competir cos seus partners, de aí que pronto teremos no mercado smartphones
compatibles con Continuum a prezos máis axustados.
Temos así que o “auténtico ordenador de peto” de Acer, o smartphone Liquid Jade
Primo, que incluso comercializarase coa base que facilita a súa conexión a un
monitor/televisor, un teclado e un rato, vai chegar a un prezo bastante
asumible se atendemos ao prezo que terá en
Filipinas, onde veñen de anunciar que se venderá este smartphone a 18.990 pesos,
que ao cambio serían 368 euros, prezo bastante atractivo para un smartphone que
pode sacar de máis dun apuro ao funcionar como equipo informático para
aplicacións universais (como Microsoft Office).
Falamos cunha xenerosa pantalla AMOLED Full HD de 5,5 polgadas, que para
conseguir a potencia necesaria está equipado cun procesador de 6 núcleos e 64
bits, 3 GB de RAM e 32 GB de almacenamento interno. Tamén conta con cámaras de
21 e 8 Mpíxeles, de xeito que incluso como smartphone de gama media-alta sería
bastante atractivo, aínda que habería que agardar até o mes de decembro para
velo nas tendas.