Novo pulo ó papel electrónico coa invención dos circuítos transparentes
venres, 10 de agosto do 2007
Un grupo de investigadores do Centro de
Nanotecnoloxía de la Universidade de Purdue vén de descubrir a forma de
crear transistores e circuítos transparentes, que poderían ser un paso de vital
importancia para o desenvolvemento do chamado papel electrónico e outras novas
tecnoloxías e plataformas.
Os circuítos en cuestión poden ser montados de
dous xeitos: ou ben en capas de plástico flexible ou ben en base a estratos de
cristal. No artigo publicado pola dita universidade, os autores explican que a
importancia do descubrimento tocaría tres áreas concretas da ciencia: pantallas
de visualización transparentes, desenvolvemento do papel electrónico, e aplicacións
para tarxetas de crédito e sistemas de información que substituirían ó código
de barras.
Como exemplo dos beneficios da proxección e
visualización de imaxes sobre superficies transparentes menciónase que por
exemplo os taboleiros dos coches darían lugar a unha imaxe no parabrisas que
lle permitiría ao condutor manter a vista no seu vieiro no intre de controlar a
que velocidade vai. Por outra parte, tamén se fai referencia á creación de
anteollos transparentes, que permitirían a recepción de imaxes e terían aplicación
tanto no lecer coma na medicina e como non, no equipamento das forzas de
seguridade.
O sucesor
do papel: o e-paper
Sen dúbida a aplicación máis importante dos
circuítos transparentes sería a de facer realidade a chegada masiva e
comunmente aceptada do famoso papel electrónico, algo sobre o que están a
traballar dende hai máis dunha década científicos do mundo, e que semella que
finalmente podería chegar a facerse realidade. A cuestión é que, a diferenza
das pantallas, o e-paper aproveitaría
os reflexos da luz na superficie tal e coma acontece co papel tradicional. Para
que isto sexa posible, a superficie debe permitir o paso da luz, e o reflexo da
mesma, co fin de que deixe de ser necesaria a luz artificial, coma a das
pantallas dos ordenadores, que termina por esgotar la vista logo dun par de
horas de lectura.
Cada peza de e-paper podería ser reutilizada tantas veces como se queira, e,
amais de permitir un mellor aproveitamento dos recursos forestais -e non contaminar-,
podería usarse tamén como una pantalla tradicional (aínda haberá que agardar
para que podamos ter unha boa resolución nestas pranchas, pero seguro que a espera non será longa de máis).
Por último, cómpre dicir que estes circuítos
poderían incluírse nas denominadas “tarxetas intelixentes”, que son semellantes
ás tarxetas bancarias de toda a vida pero que permiten un intercambio de datos
cos lectores, feito que podería ser empregado para mostrar o noso balance na
mesma tarxeta e para permitir transaccións automáticas -por exemplo- no intre
de facer uso dos servizos de transporte público, unha especie de telepeaxe que
evitaría a perda de tempo da compra de billetes.
Tamén podería amorearse nela información sobre
o noso número da Seguridade Social, e datos de interese médico como os
relativos a alerxias ou ó noso factor sanguíneo.