Novo portátil pensado para xogar baixo Windows Vista

luns, 30 de xullo do 2007 Marcus Fernández

O fabricante británico Rock porá á venda o vindeiro día 6 os seus novos portátiles Pegasus 670, que destacan por contar cunha tarxeta gráfica NVidia GeForce 8600M GT con 512 Mb de memoria e compatibilidade con DirectX 10, ou sexa, perfectos para xogar dende Windows Vista, o que sería un dos primeiros portátiles no mercado en tirar un bo proveito do contorno gráfico do último sistema operativo de Microsoft.
Os Pegasus 670 inclúen 1 Gb de RAM, 120 Gb de disco duro SATA 5.400, pantalla de 15,4 polgadas (cunha resolución de 1.680 x 1.050 píxeles), regravadora de DVD, webcam de 1,3 Mpíxeles, Gigabit Ethernet, Bluetooth, Wi-Fi (IEEE 802.11a/b/n) e un procesador que vai dende o Core 2 Duo T7300 a 2 GHz ata o T7700 a 2,4 GHz con prezos entre as 899 e as 1.198,99 libras (entre 1.332,84 e 1.777,40 euros).
Como punto negativo podemos destacar que o equipo pesa 3 quilogramos.

PUBLICIDADE