Novo móbil de Sony Ericsson capaz de subir as súas gravacións de vídeo a YouTube

martes, 9 de setembro do 2008 Marcus Fernández

Sony Ericsson presentou o móbil G705, que será un dos seus principais lanzamentos para o último trimestre do ano, e que inclúe unha pantalla de 2,4 polgadas (que rota os seus contidos grazas a un acelerómetro e ten unha resolución de 240 x 320 píxeles), unha alta conectividade (GPS cuatribanda, HSDPA, Wi-Fi e Bluetooth A2DP), aGPS que se pode utilizar combinado co servizo Google Maps para móbiles, sintonizador de radio FM, cámara de 3,2 Mpíxeles (con flash LED) e lector de tarxetas M2 (inclúe unha de 1 Gb).
Pero parece que o software do Sony Ericsson G705 é o seu punto forte, pois aparte de acceder a Google Maps, tamén inclúe o Wayfinder Navigator (cunha licenza válida por 3 meses) e mesmo é capaz de subir directamente a YouTube os vídeos gravados coa súa cámara dixital. Tamén inclúe un lector de fluxos RSS e un navegador de páxinas web (con soporte completo de HTML).
O terminal mide 95 x 47 x 14,3 milímetros, pesa 98 gramos, venderase en cor dourada ou negra e a súa autonomía é de 400 horas en espera e 10 en conversa (baixo redes GPS) ou de 350 horas en espera e 4 en conversa (baixo redes 3G), mentres que coa videochamada a súa batería é capaz de durar 3 horas.